Më 9, 10, 11 dhe 14, 15, 16 mars 2011, IGJK në bashkëpunim me US DoJ dhe Institutit Kombëtar të Avokimit gjatë Gjykimit (NITA) të SHBA-ve, në kuadër të Programit të Vazhdueshëm për Arsimim Ligjor si dhe Programit të Trajnimeve për Avancim kanë realizuar dy sesione trajnuese treditore me temë “Ndërtimi i Shkathtësive të Përfaqësimit gjatë Gjykimit “.
Qëllimi kryesor i këtyre trajnimeve ishte ngritja e shkathtësive praktike të gjyqtarëve dhe prokurorëve për përdorimin e teknikave më të avancuara të përfaqësimit gjatë gjykimit.
Çështjet të cilat janë trajtuar gjatë këtyre sesioneve trajnuese kryesisht kishin të bënin me teknikat e marrjes në pyetje të drejtpërdrejtë, tërthortë, vënien në dyshim, rimarrjen në pyetje të pandehurve, dëshmitarëve, ekspertëve, si dhe teknikat e paraqitjes së fjalës hyrëse dhe argumentimit përfundimtar, si nga ana e prokurorit ashtu edhe nga ana e avokatit mbrojtës.
Gjatë këtyre trajnimeve pjesëmarrësve ju mundësua që përmes punës në grupe të demonstrojnë shkathtësitë e tyre të përfaqësimit gjatë gjykimit, duke punuar rreth një rasti praktik dhe duke përdorur teknikat e prezantuara nga trajnuesit vendor të trajnuar posaçërisht për mbajtjen e këtij trajnimi.
Me këtë rast këshilltarja ligjore e Ambasadës Amerikane në Kosovë, znj. Kimberly Moore shprehu, kënaqësi të veçantë për përgatitjen profesionale dhe avancimin e vazhdueshëm të stafit trajnues sipas programit NITA-s dhe njëkohësisht e vlerësoj lartë kontributin e trajnuesve të IGJK-së në organizimin dhe realizimin me sukses të trajnimit.
Përfitues të këtyre trajnimeve ishin gjyqtarë dhe prokurorë nga të gjitha nivelet dhe regjionet e Kosovës.
13-05-2011