PTA Trajnim për bashkëpunëtorët profesional IGJK

Më 3 shkurt 2012, IGJK në kuadër të Programit për Profesionistët tjerë në kuadër të sistemit gjyqësor e prokurorial, ka realizuar ciklin e parë të trajnimit nga moduli për bashkëpunëtorët profesional.

Qëllimi i këtij trajnimi ishte që bashkëpunëtorëve profesional tu ofrohen njohuri më të detajuara për veprimtarinë e tyre profesionale në sistemin gjyqësor dhe prokurorial të Kosovës.

Objektivat kryesore të këtij trajnimi ishin:
•  të kuptuarit e rolin të bashkëpunëtorëve profesional;
•  njohja me bazën ligjore e cila rregullon veprimtarinë e bashkëpunëtorëve profesional; 
•  të kuptuarit e detyrave në ofrimin e shërbimit profesional si në gjykata ashtu edhe në prokurori të Kosovës.

Çështjet të cilat u trajtuan gjatë këtij trajnimi ishin: roli i bashkëpunëtorëve profesional në sistemin gjyqësor dhe prokurorial, rëndësia e pavarësisë së gjyqësorit, standardet ndërkombëtare për statusin e bartësve të funksionit të judikaturës, pavarësia dhe paanësia e gjyqësorit dhe raportet në mes organeve të judikaturës dhe pushtetit legjislativ dhe ekzekutiv.

Gjatë trajnimit pjesëmarrësit patën rastin që përmes punëve në grupe të demonstrojnë njohuritë e tyre në përpilimin e llojeve të ndryshme të aktvendimeve si; aktvendimit për fillimin e hetimeve, aktvendimit për shpalljen e personit të zhdukur si të vdekur dhe lloje tjera të aktvendimeve nga Ligji për Procedurën Jokontestimore.

Përfitues ishin bashkëpunëtorët profesional të gjykatave dhe prokurorive të Kosovës të të gjitha niveleve.