Më 02 qershor 2016, Instituti Gjyqësor i Kosovës në kuadër të Programit të Trajnimeve të Vazhdueshme (PTV), ka realizuar trajnimin me temë “Mjekësia ligjore dhe organizimi i Agjencisë së Kosovës për Forenzikë”
Ky trajnim kishte për synim trajtimin e dilemave dhe vështirësive që hasen në praktikën gjyqësore që kanë të bëjnë me ekspertizën mjeko ligjore dhe atë forenzike, me fokus në elaborimin e përmbajtjes së kërkesës, raportit të ekspertizës dhe interpretimit të saj.
Në kuadër të këtij trajnimi u elaboruan roli dhe shërbimet që ofron Instituti i Mjekësisë Ligjore, eksperti mjeko ligjor dhe angazhimi i ekspertit nga prokurori i shtetit apo gjyqtari, dhe ekspertiza mjekoligjore si provë e rëndësishme në procedurën penale. Më tej trajnimi u fokusua në shtjellimin e rolit dhe shërbimeve që ofron Agjencia e Kosovës për Forenzikë, raporti i saj me prokurorinë dhe standardet ndërkombëtare për ekspertime forenzike.
Metodologjia e aplikuar në këtë trajnim ishte e kombinuar, me shpjegime teorike dhe diskutime interaktive, me ç’ rast pjesëmarrësit shkëmbyen përvojat e tyre në këtë fushë si dhe u diskutua për krijimin e praktikave më të mira në këtë drejtim.
Përfitues të këtij trajnimi ishin gjyqtarë të nivelit themelor.
02-06-2016