Më 18 Qershor 2012, IGJK në bashkëpunim me UNICEF-in ka mbajtur një tryeze pune me ekspertë të lëmisë së drejtësisë për fëmijë. Qëllimi i kësaj tryeze ishte hartimi i një protokolli të përbashkët referues në fushën e drejtësisë për fëmijë.
Në këtë tryezë u diskutua për natyrën dhe strukturën e protokollit, në mënyrë që në formë sa më koncize dhe të shkurtë të përshkruhet roli dhe detyrat e institucioneve relevante të drejtësisë për fëmijës si: gjykatat, prokuroritë, shërbimi policor, shërbimi sprovues, organi i kujdestarisë, organi për ndërmjetësim dhe oda e avokatëve.
Në tryezë u përcaktua që puna e secilit institucion të përmendur të pasqyrohet në këtë protokoll duke u bazuar në strukturën e mëposhtme:
• Roli: Ku duhet të vendosen të dhënat referuese sipas kompetencave profesionale që ka institucioni;
• Dispozitat e Shërbimeve: Varësisht nga organizata/institucioni, këtu përfshihen shërbimet të cilat ofrohen, qoftë duke i renditur/paraqitur në detaje, apo duke i paraqitur linearisht përmes numrave;
• Përgjegjësitë Kyçe: Këtu mund të hyjnë, shkëmbimi i informatave gjatë dhe pas proceseve të hulumtimeve, vlerësimit te rasteve veç e veç si dhe menaxhimit të tyre nga ana e institucioneve relevante, institucioni apo organizata e parë kontaktuese për rastin e caktuar, të drejtat dhe detyrimet e organizatave/institucioneve të ndryshme nga aspekti i fushë-veprimtarisë se tyre të përditshme.
18-06-2012